Estivadas

Sosten al Festenal Interregional de las Culturas Occitanas

FacebookTwitterRssSoundCloud

L’Estivada ?

Nòta : mercés de considerar que çò qu’es escrich debàs es un tèxte publicat avant los trebolaments de l’Estivada. Res de çò qu’es avançat aquí es pas mai assegurat, e res depen pas mai dels proprietaris d’aqueste site, site de sosten al festenal tal coma es descrich. Aquel tèxte es daissat a títol d’informacion, e coma archiva. Per tota entresenha concernissent lo festenal dins sa forma actuala, mercés de vos virar cap a la Vila de Rodés.

Rodés, cap-luòc d’Avairon, en aculhissent l’Estivada dempuèi vint ans, es venguda al fial dels ans la capitala d’un país sens frontièras, sens armadas nimai Estat e definit sonque per sa lenga e sa cultura : Occitània. Podrem pas s’empachar, a l’ocasion del passatge d’aqueste cap simbolic, d’agachar çò que nòstre festenal es vengut : 8 regions de França ara amassadas, de partenaris en Itàlia e en Catalonha, d’amistats que van plan al delà, de centenats d’artistas e de detzenas d’espectacles programats… Degun auriá poscut dire que capitariam de far d’un eveniment occitan un vertadièr succès popular !
Mas lo cap d’an es pas lo cap del camin, e de trabalh ne demòra, e fòrça. De cap a la reconeissença d’aquelas lengas e culturas que cada an botam sul davant de m’epont. De cap a de vertadièras dinamicas creativas, per que l’aqui posca enfin viure e inventar. Podèm pas demorar en defòra de la tectonica dels territòris, que vei las termièras se mòure, las linhas se passar, los dialògs se simplificar, las idèias s’escambiar…

Alara, l’Estivada, qu’es aquò ?

Un festenal coma cap autre

EstivadaReconegut coma lo festenal occitan de referéncia per sa pluridisciplinaritat e sa singularitat de festenal interregional de las culturas occitanas, l’Estivada ensaja, per sas perpausicions artisticas e culturalas coma per sa pratica, de copar las representacions “folcloristas” tròp sovent estacadas a las lengas e culturas dichas regionalas. Luènh de las ressègas, avèm una vision modèrna e universalista de nòstra identitat, que se resigna pas al silenci e cèrca a çò que l’occitan tòrne trobar la plaça que dèu èstre la sèuna : lenga de vita e pas del sol sovenir.
Tota la programacion de l’Estivada es doncas fargada a l’entorn de la lenga occitana, la lenga minoritària de tota la mitat Sud de França, tant plan coma de qualquas regions dels paises vesins (Espanha e Itàlia). Cercam a ne mostrar lo melhor, e a ancorar nòstra istòria dins lo sègle 21. Aquò nos empacha pas evidentament d’aver d’amistats, de còps de còr, de solidaritats amb d’autres artistas, d’autras lengas, d’autres pòples.
Èstre occitan es una causida, una conviccion pregonda, qu’es la nòstra, e que permet pas la neutralitat : l’Occitan es encara una lenga “sens-papièrs” e Occitània existis sonque se, a cada generacion, d’òmes e de femnas se reconeisson occitans. Luènh d’impausar que que siá, perpausam als esperits dobèrts de novèlas lecturas de las lengas, de las culturas, de la societat, per que cadun posca en plen consciéncia se reconèisser, se tornar trobar, descobrir, partatjar..
Volèm bolegar las causas, e los 20 ans son l’ocasion de dire que volèm per nòstra lenga, l’occitan, un estatut que li autorise una plaça normala al quotidian… E la normalitat passa per l’abausonament de las parets de certesa qu’environèron tostemps las culturas minorizadas : estereòtipes, escorcièras, reduccions… Mas fasèm mèfi de pas daissar degun sus la talvera : a l’Estivada lo sectarisme es pas de jòc. Trobaretz qualqu’un o quauquarren per vos acompanhar dins la descobèrta de la lenga o de la cultura occitana : artistas, benevòles, bancs assoicatius, formators, Guida de Subrevida, documentacion…

Un ancoratge local, de cooperacions transfrontalièras

Al-delà del festenal, trabalham a la presa en compte de l’occitan dins la vitz del territòri rodanés e la societat en general ; a estructurar de partenariats, coma, dins l’encastre de l’Euròregion Pirenèus-Mediterranèa (qu’amassa Miègjorn-Pirenèus, Lengadòc-Rosselhon, Catalonha e Isclas Balearas), amb la Fira Mediterranià de Manresa o Sa Xerxa de Teatre Infantil i Juvenil de les Illes Baleras a l’entorn d’escambis artistics occitan-catalans, e lo CIRDÒC sus un forum, materializacion de refleccions, d’escambis e de rencontres sus una escala de territòri agrandida. Occitània, plata-fòrma d’escambi europenca, i cresèm e sèm totjorn disponibles per trabalhar amb qual vòl inscriure l’occitan dins la normalitat sociala e culturala que dèu èstre la seuna dins la societat. Es aital que menam tanben un fòrt trablah d’acompanhament de joves artistas en ligam amb lo Centre Nacional d’escritura de la cançon “Voix du Sud” a Astafòrt.
Viatjar fòrça nos empacha pas de saber d’ont venèm, e se teissam de ligams per-delà mars e montanhas, es a Rodés que sèm, e es plan aqui que contunharem a viure : Integram a l’entorn del festenal una crana partida del teissut economic local : productors, entrepresas, e los quites benevòles, privilegiam fins a la nòstra organizacion la concepcion d’un local a l’encontre de l’universal.

L’interregionalitat sens regionalisme

Regions OccitanesLa question es sovent pausada : perque “festenal interregional” ? Perque i a pas d’Occitània sens interregionalitat, aqui perque nos adreiçam a totas las regions occitanas : Aquitània, Peitau-Charentas, Lemosin, Auvèrnhe, Ròse-Aups, Provença-Aups-Còsta d’Azur, Lengadòc-Rosselhon, Miegjorn-Pirenèus, Val d’Aran en Catalonha, Valadas Occitanas del Piemont. Totas dison de òc, menan lors artistas, lors idèias, lors politicas linguisticas e culturalas de còps, e sorgis d’aquela cooperacion la consciéncia vertadièra d’una unitat a l’occitana, una unitat que se fa sonque dins sa diversitat. Puèi, cada annada, d’elegits-das d’aquelas regions son present-a-s a l’Estivada per escambiar, debatre, bastir amassa d’orientacions comunas per la promocion e la valorisacion de l’occitan. S’i parla de democracia, de globalizacion, de cultura, d’emplec, de social…

Un espaci e un temps diferents

En mai de la musica e de las autras disciplinas artisticas, del grand nombre d’espectacles, totes plan diferents, d’encontres facilitats amb los artistas, de moments inedichs que se tòrnan pas produïre alhors, l’Estivada es un ambient, una atmosfèra unenca.

Barratz los uèlhe e imaginatz un monde ont òm pòt s’exprimir liurament dins sa lenga, ont las majoritats e las minoritats se mesclan gaujosament, ont òm pòt charrar tranquillament amb son vesin sens jutjar nimai èstre jutjat sus las aparéncias, ont òm pòt aprene en se divertir, e se divertir de biais inteligent, escotar totas menas de musicas amb una aurelha, las doas, las mans o los pès…

Ara dobrissètz los uèlhs : es l’estiu, lo solèlh escandalha d’una suauda calor (lo perfièch climat avaironés), davant senhorèja una panèl “Rodés”. Anem, encara un esfòrç, e i sètz !

Estivada

Qual que siatz : cacha-niu, acostumat, acarnassit… D’onte que siatz : del vesinat, de la region a costat o de la galaxia venenta…Siatz los planvenguts a l’Estivada !

1 Comentari

  1. bonsoir je suis aveyronnais d origine je vous felicite

Leave a Reply